راگەیاندنى وەزارەتى ئەوقاف
چەندین جار لەوەزارەتى ئەوقاف و لەرێگەى ئیمام و خەتیبى مزگەوتەکانەوە ئاماژەمان بۆ ئەوە کردوە کە رێورەسمى پرسە نەکرێتە هۆکارێک بۆ ڕیایى و خۆدەرخستن و خۆناساندن ،چونکە ئەوە پێچەوانەى داب و نەریتى رەسەنى کوردایەتى و شەریعەتى ئیسلامە،هەر لەو چوارچێوەیەشدا چەندین جار لەبارەى نوسینى لافیتەى پرسە رێنماییمان بڵاوکردۆتەوە و داوامان کردوە لافیتەکان بەکورتى و بۆ کارئاسانى و شارەزایى شوێنى پرسەکە بنوسرێت،بەڵام بەداخەوە هەندێ کەس و خانەوادە لەشارى هەولێر  سەرەراى ئاستى بەرزى خوێندەواریى و رۆشنبیریان کەچى بەم شێوەیە بانگەشە بۆ خۆیان و پرسەکەیان دەکەن و ناوى یەکە یەکەى بنەماڵە و خانەوادە و پیشە و نازناوەکانیان دەنوسن،لەپاڵ ئەمەشدا دورودرێژى ئەم لافیتەیە جگەلەوەى خوێنەران لەناو بازاردا ماندو دەکات ،سیماى دیوار و دیمەنى شوێنە گشتیەکانى پایتەختى هەرێمى کوردستانیش دەشێوێنێت چونکە زۆرجار ئەو لافیتانە بەبزمار دادەکوترێن ،ئەمە دیاردەیەکى ناتەندروستە و مامۆستایانى ئاینیش بەدیاردەیەکى ناشەرعى دادەنێن و هیوادارین چیتر هاوڵاتیان بەم شێوازە دروشم و لافیتە بۆ پرسەکانیان نەنوسن.