سلێمانی‌/  به‌مه‌به‌ستی‌ به‌نێوده‌وڵه‌تیكردنی‌ مۆزه‌خانه‌ی‌ سلێمانی‌، به‌هرۆز محه‌مه‌د ساڵح پارێزگاری‌ سلێمانی‌‌و محه‌مه‌د جه‌لید نوێنه‌ری‌ رێكخراوی‌ یونسكۆ له‌ عێراق لێكگه‌یشتننامه‌یه‌كیان بۆ به‌نێوده‌وڵه‌تیكردنی‌ مۆزه‌خانه‌ی‌ سلێمانی‌ له‌ عه‌ممانی‌ پایته‌ختی‌ ئوردون ئیمزاكرد.

به‌پێی‌ راگه‌یاندراوێكی‌ نوسینگه‌ی‌ رۆژنامه‌وانیی‌ پارێزگاری‌ سلێمانی‌ لێكگه‌یشتننامه‌كه‌ دوێنێ‌ (دووشه‌ممه‌) ئیمزاكراوه‌‌و “بڕیاره‌ له‌سه‌ره‌تای‌ مانگی‌ داهاتوودا وه‌فدێكی‌ رێكخراوی‌ یونسكۆ سه‌ردانی‌ هه‌رێمی‌ كوردستان و پارێزگای‌ سلێمانی‌ بكات بۆئه‌وه‌ی‌ هه‌نگاوی‌ یه‌كه‌می‌ پرۆژه‌كه‌ ده‌ست پێبكات كه‌ بریتییه‌ له‌دروستكردنی‌ ماسته‌رپلانی‌ مۆزه‌خانه‌، له‌لایه‌ن كه‌سێكی‌ شاره‌زاو پسپۆره‌وه‌ كه‌ چه‌ندین ماسته‌پلانی‌ بۆ مۆزه‌خانه‌ جیهانییه‌كان كردووه‌ و له‌ماوه‌ی‌ دوو ساڵدا دیزان و ماسته‌رپلانه‌كه‌ی‌ ته‌واو ده‌بێت”.

له‌و لێكگه‌یشتننامه‌یه‌دا بڕیاردراوه‌ دیزاین و شێوازێكی‌ مۆدێرن دابڕێژرێت بۆئه‌وه‌ی‌ مۆزه‌خانه‌ی‌ سلێمانی‌ مۆركێكی‌ نێوده‌وڵه‌تی‌ وه‌ربگرێت كه‌ له‌سه‌ر ئاستی‌ هه‌رێمی‌ كوردستان و عێراق نمونه‌یی‌ بێت.

ئه‌م پرۆژه‌یه‌ له‌لایه‌ن رێكخراوی‌ یونسكۆوه‌ سه‌رپه‌رشتی‌ ده‌كرێت و به‌هاوكاری‌ حكومه‌تی‌ هه‌رێمی‌ كوردستان جێبه‌جێ‌ ده‌كرێت.

به‌پێی‌ راگه‌یاندراوه‌كه‌ “به‌م هه‌نگاوه‌ی‌ پارێزگای‌ سلێمانی‌ و به‌ئیمزاكردنی‌ ئه‌م لێكگه‌یشتننامه‌یه‌ مۆزه‌خانه‌ی‌ سلێمانی‌ له‌سه‌ر ئاستی‌ عێراق و ناوچه‌كه‌ ده‌بێته‌ مۆزه‌خانه‌یه‌كی‌ نمونه‌یی‌ و ئه‌مه‌ش یه‌كه‌م كارو پرۆژه‌ی‌ له‌وجۆره‌یه‌ كه‌رێكخراوی‌ یونسكۆ له‌عێراقدا بۆ مۆزه‌خانه‌یه‌كی‌ جێبه‌جێ‌ بكات”.